ମାଡ଼ି ଆସୁଛି ସାମୁଦ୍ରିକ ଝଡ଼ ‘ଫଣି’,ପୁରୀର ସବୁ ହୋଟେଲ ଖାଲି କରିବାକୁ ଜିଲ୍ଲାପାଳଙ୍କ ନିର୍ଦେଶ

tourists are directed to leave puri by tomorrow evening

ଦକ୍ଷିଣ ପୂର୍ବ ବଙ୍ଗୋପସାଗରରେ ସୃଷ୍ଟି ହୋଇଥିବା ସାମୁଦ୍ରିକ ଝଡ଼ ‘ଫଣି’ ଭୟଙ୍କର ରୂପ ନେଇ ଓଡ଼ିଶା ଆଡକୁ ମାଡ଼ି ଆସୁଛି । ଏହାକୁ ଦୃଷ୍ଟିରେ ରଖି ୨ ତାରିଖରୁ ସମସ୍ତ ସରକାରୀ ଅନୁଷ୍ଠାନଗୁଡ଼ିକରେ ଛୁଟି ଘୋଷଣା କରାଯାଇଛି । ପରବର୍ତ୍ତୀ ଆଦେଶ ପର୍ଯ୍ୟନ୍ତ ଛୁଟି ଜାରି ରହିବ ବୋଲି ସ୍ୱତନ୍ତ୍ର ରିଲିଫ କମିଶନର ପ୍ରକାଶ କରିଛନ୍ତି । ସେହିପରି ୨ ତାରିଖ ସୁଦ୍ଧା ପୁରୀ ଛାଡ଼ି ଚାଲିଯିବାକୁ ପର୍ଯ୍ୟଟକଙ୍କୁ କୁହାଯାଇଛି। ଝଡ଼ତୋଫାନ ଓ ବର୍ଷାକୁ ଦୃଷ୍ଟିରେ ରଖି ୩ ଓ ୪ ତାରିଖରେ ସାଧାରଣ ପରିବହନ ବ୍ୟବସ୍ଥା ବନ୍ଦ ରହିବ ବୋଲି ସୂଚନା ଦିଆଯାଇଛି । ବୈଷୟିକ ଶିକ୍ଷା ବିଭାଗ ପକ୍ଷରୁ ମଧ୍ୟ ଏଥିପାଇଁ ପଦକ୍ଷେପ ନିଆଯାଇଛି ୨, ୩ ଓ ୪ ତାରିଖରେ ହେବାକୁ ଥିବା ସମସ୍ତ ପରୀକ୍ଷା ବାତିଲ କରାଯାଇଛି । ପରବର୍ତ୍ତୀ ନିର୍ଦେଶ ଯାଏ ବୈଷୟିକ ଶିକ୍ଷାନୁଷ୍ଠାନରେ ପରୀକ୍ଷା ବନ୍ଦ ରହିବ । ମେ ୧ସନ୍ଧ୍ୟାରୁ ଓଡ଼ିଶାର ଖୋର୍ଦ୍ଧା, ଗଞ୍ଜାମ, କେନ୍ଦ୍ରାପଡ଼ା ଓ ପୁରୀ ଜିଲାରେ ‘ଫଣି’ ପ୍ରଭାବ ଅନୁଭୂତ ହେବ ବୋଲି ଭାରତୀୟ ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି। ‘ଫଣି’ ବଙ୍ଗୋପସାଗରର ଦକ୍ଷିଣ ପୂର୍ବରେ, ଶ୍ରୀଲଙ୍କାର ତ୍ରିଙ୍କୋମାଲିଠାରୁ ୬୨୦କିମି ପୂର୍ବ ଉତ୍ତର ପୂର୍ବ, ଚେନ୍ନଇଠାରୁ ୮୪୦କିମି ପୂର୍ବ-ଦକ୍ଷିଣ ପୂର୍ବ ଏବଂ ଆନ୍ଧ୍ରପ୍ରଦେଶର ମଛଲିପଟନମଠାରୁ ୯୯୦ କିଲୋମିଟର ଦକ୍ଷିଣ ପୂର୍ବ ଦିଗରେ କେନ୍ଦ୍ରୀଭୂତ ହୋଇଛି। ଏବେ ଏହା ଭୟଙ୍କର ସାମୁଦ୍ରିକ ଝଡ଼ରେ ପରିଣତ ହୋଇଛି । ୩ ତାରିଖ ଦିନ ପୁରୀର ଦକ୍ଷିଣ ଭାଗରେ ’ଫଣି’ ସ୍ଥଳଭାଗ ଛୁଇଁବ ବୋଲି କୁହାଯାଉଛି। ସ୍ଥଳ ଭାଗ ଛୁଇଁବା ସମୟରେ ଏହାର ଘଣ୍ଟା ପ୍ରତି ବେଗ ପ୍ରାୟ ୧୮୦ରୁ ୧୯୦ କିଲୋମିଟର  ରହିବ ବୋଲି ସତର୍କ ସୂଚନା ଜାରି କରାଯାଇଛି । ଏଥିପାଇଁ ପୁରୀର ସବୁ ହୋଟେଲ ଖାଲି କରିବାକୁ ଜିଲ୍ଲାପାଳ ନିର୍ଦେଶ ଦେଇଛନ୍ତି। ୨ରୁ ୫ ତାରିଖ ଯାଏ କୌଣସି ବୁକିଂ ନ ରଖିବାକୁ ନିର୍ଦେଶ ଦିଆଯାଇଛି । ସମୁଦ୍ରରେ ନ ଗାଧୋଇବା ପାଇଁ ସତର୍କ କରାଇଛି ଜିଲ୍ଲା ପ୍ରଶାସନ। ୨ ତାରିଖ ସନ୍ଧ୍ୟା ସୁଦ୍ଧା ପର୍ଯ୍ୟଟକଙ୍କୁ ପୁରୀ ଛାଡ଼ିବାକୁ କୁହାଯାଇଛି । ଅତି ଆବଶ୍ୟକ ନ ଥିଲେ ପୁରୀ ଗସ୍ତ ବାତିଲ କରିବାକୁ ମଧ୍ୟ ପରାମର୍ଶ ଦିଆଯାଇଛି ।ସମ୍ଭାବ୍ୟ ବାତ୍ୟା ‘ଫଣି’ ପାଇଁ ଓଡ଼ିଶାର ୧୧ ଜିଲ୍ଲାରୁ କୋଡ୍‌ ଅଫ କଣ୍ଡକ୍ଟ ହଟାଇଲେ ଏସିଆଇ । କାଲି ଏସିଆଇଙ୍କୁ ସାକ୍ଷାତ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସମ୍ଭାବ୍ୟ ବାତ୍ୟା ‘ଫଣି’ର ମୁକାବିଲା ପାଇଁ NDRF ଟିମ୍‌ ପ୍ରସ୍ତୁତ ହୋଇ , ପ୍ରଥମ ପର୍ଯ୍ୟାୟରେ ବାହାରିଲେ ୫ଟି ଟିମ୍‌, ଜଗତସିଂହପୁରକୁ ୩ ଓ ଭଦ୍ରକକୁ ୨ଟି ଟିମ୍‌ ଯାଇଛନ୍ତି। ‘ଫଣି’, ସହାୟତା ପାଇଁ ରାଜ୍ୟ ବାହାରୁ ଆସିବେ ଅତିରିକ୍ତ ୧୦ଟି ଟିମ୍‌ ବୋଲି ସୂଚନା ମିଳିଛି ।

Previous ରାଫେଲ ମାମଲା: ମେ’ ୬ରେ ଶୁଣାଣି!
Next ବଢ଼ିଲା ରନ୍ଧନ ଗ୍ୟାସ ଦର

No Comment

Leave a reply

Your email address will not be published. Required fields are marked *