ଆଇକ୍ୟୁ ଟେଷ୍ଟରେ ଆଇନଷ୍ଟାଇନଙ୍କୁ ମାତ୍ ଦେଲେ 10 ବର୍ଷୀୟ ‘ମାହି’

10 Years Old Beats Einstein in IQ Test

ଇଂଲଣ୍ଡର ସର୍ବକନିଷ୍ଠ ପ୍ରତିଯୋଗୀ ଭାବେ ମେନ୍ସା ଆଇକ୍ୟୁ ଟେଷ୍ଟରେ ସର୍ବୋଚ୍ଚ ନମ୍ବର ରଖିବାର ମାନ୍ୟତା ପାଇଛନ୍ତି ମେହୁଲ ଗର୍ଗ ଓରଫ୍ ମାହି । ଭାରତୀୟ ବଂଶୋଦ୍ଭବ ମାହି ଏହି ପ୍ରତିଯୋଗିତାରେ 162 ନମ୍ବର ରଖି ପ୍ରଖ୍ୟାତ ବୈଜ୍ଞାନିକ ଆଇନଷ୍ଟାଇନ ଓ ଷ୍ଟିଫେନ ହକିଙ୍ଗଙ୍କୁ ମଧ୍ୟ ପଛରେ ପକାଇଦେଇଛନ୍ତି । ଏହି ବିଚକ୍ଷଣ ବୁଦ୍ଧିମତା ପରୀକ୍ଷାରେ ଆଇନଷ୍ଟାଇନ ଓ ଷ୍ଟିଫେନ ହକିଙ୍ଗ 160 ସ୍କୋର କରିଥିଲେ । ସେମାନଙ୍କ ଠାରୁ 2 ମାର୍କ ଅଧିକ ରଖିଥିବା ମାହି ବିଶ୍ୱ ଜନସଂଖ୍ୟାର ଏକ ପ୍ରତିଶତ ଲୋକଙ୍କ ମଧ୍ୟରେ ସାମିଲ ହୋଇଛନ୍ତି ।

କେବଳ ମାହି ନୁହନ୍ତି, ଗତବର୍ଷ ତାଙ୍କ ବଡ଼ ଭାଇ 13 ବର୍ଷୀୟ ଧ୍ରୁବ ଗର୍ଗ ମଧ୍ୟ ମେନ୍ସା ଆଇକ୍ୟୁ ଟେଷ୍ଟରେ ସେହି ସମାନ ନମ୍ବର 162 ରଖିଥିଲେ । ଦକ୍ଷିଣ ଇଂଲଣ୍ଡ ରିଡିଂ ସହରର ରିଡିଂ ବଏଜ୍ ଗ୍ରାମାର୍ ସ୍କୁଲରେ ପଢ଼ୁଥିବା ମାହି ତାଙ୍କ ଭାଇଙ୍କ ଠାରୁ କୌଣସି ଗୁଣରେ କମ୍ ନୁହନ୍ତି ବୋଲି ପ୍ରମାଣିତ କରିବା ଜିଦରେ ଏହି ଟେଷ୍ଟ୍ ଦେଇ କୃତୀତ୍ୱ ଅର୍ଜନ କରିଛନ୍ତି । ମାହିଙ୍କ ମାଆଙ୍କ ନାଁ ଦିବ୍ୟା ଗର୍ଗ ଓ ବାପାଙ୍କ ନାଁ ଗୌରବ ଗର୍ଗ ।

ମେନ୍ସା ଆଇକ୍ୟୁ ଟେଷ୍ଟରେ ମାହିଙ୍କୁ ନିର୍ଦ୍ଦିଷ୍ଟ ପରୀକ୍ଷା ଅବଧିରେ କେତେକ ଭାଷାଜ୍ଞାନ ଓ ତର୍କ ସମ୍ପର୍କିତ କଠିନ ପ୍ରଶ୍ନର ଉତ୍ତର ଦେବାକୁ ପଡ଼ିଥିଲା । ସେ ପରୀକ୍ଷା ଆରମ୍ଭରୁ ଖୁବ୍ ଚିନ୍ତିତ କରିଦେଇଥିଲା କିନ୍ତୁ ପ୍ରଥମ କିଛି ପ୍ରଶ୍ନର ଉତ୍ତର ଦେଇସାରିବା ପରେ ସେ ସହଜ ଅନୁଭବ କରିଥିଲେ । ଆଉ ଯେତେବେଳେ ପରୀକ୍ଷା ଫଳ ବାହାରିଲା, ସେତେବେଳେ ସେ ଖୁସିରେ କାନ୍ଦି ପକାଇଥିଲେ ବୋଲି ମାହି କହିଛନ୍ତି । ଗଣିତ ମାହିଙ୍କ ପ୍ରିୟ ବିଷୟ । ଏଥିସହ ସେ କ୍ରିକେଟ ଖେଳିବାକୁ, ଆଇସ୍-ସ୍କେଟିଂ କରିବାକୁ ଓ 100 ସେକେଣ୍ଡ ଭିତରେ ରୁବିକ୍ କ୍ୟୁବ୍ ସମାଧାନ କରିବାକୁ ଭଲ ପାଆନ୍ତି । ଗୁଗଲ ଭଳି ବିଶ୍ୱସ୍ତରୀୟ ଟେକ୍-କମ୍ପାନୀରେ କାର୍ଯ୍ୟ କରିବା ତାଙ୍କର ଲକ୍ଷ୍ୟ ବୋଲି ସେ କହିଛନ୍ତି । ଏବେ ମାହି ତାଙ୍କ ଭାଇଙ୍କ ସହ ମିଶି ପଡ଼ୋଶୀଙ୍କ ମଧ୍ୟରେ ସହଜରେ ଯୋଗଯୋଗ ରକ୍ଷା ପାଇଁ ଏକ ମୋବାଇଲ୍ ଆପ୍ ତିଆରି କରୁଛନ୍ତି ।

Previous 'ସୀମା ଭବାନୀ'ରେ 6 ଓଡ଼ିଆ ମହିଳାଙ୍କ ଚମତ୍କାର ବାଇକ୍ ଷ୍ଟଣ୍ଟ୍
Next ରୋମାଞ୍ଚକର ସ୍ଥିତିରେ ତୃତୀୟ ଟେଷ୍ଟ :ସମ୍ମାନ ବଞ୍ଚାଇବା ଲକ୍ଷ୍ୟରେ ଭାରତ

No Comment

Leave a reply

Your email address will not be published. Required fields are marked *