ନେତୃତ୍ୱ ନେଇ ପ୍ରଶ୍ନବାଚୀ

Question on leadership

ଇଣ୍ଡିଆ ଟୁଡ଼େ ପକ୍ଷରୁ ୨୦୧୯ ସାଧାରଣ ନିର୍ବାଚନ ପ୍ରେକ୍ଷାପଟ୍ଟରେ ଦେଶବାସୀଙ୍କ ମନୋଭାବ ସମ୍ପର୍କରେ ହୋଇଥିବା ସର୍ଭେ ରିପୋର୍ଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଲୋକପ୍ରିୟତା ସଂପର୍କରେ ଜନମତ ଥିବା ବେଳେ ଲୋକସଭାରେ ବିଜେପିର ସଂଖ୍ୟା ଗରିଷ୍ଠତା କ୍ଷୁଣ୍ଣ ହେବ ବୋଲି ଦର୍ଶାଇଛି । ସାମଗ୍ରିକ ଭାବେ ଏନଡ଼ିଏ ୨୮୧ ଆସନ ପାଇ ସରକାର ଗଢିବାର ସମ୍ଭାବନା ଥିବାବେଳେ ସହଯୋଗୀ ଦଳ ଉପରେ ବିଜେପିର ନିର୍ଭରଶୀଳତା ବୃଦ୍ଧି ପାଇବ । ଫଳରେ ସଂସଦରେ ଦଳର ପ୍ରଭାବ ଓ ପତିଆରା ହ୍ରାସ ପାଇବ । ଅନ୍ୟ ପକ୍ଷରେ ୟୁପିଏ ୧୨୨ ଓ ଅନ୍ୟାନ୍ୟ ବିରୋଧୀ ଦଳ ୧୪୦ ଆସନ ପାଇପାରନ୍ତି ବୋଲି ସର୍ଭେ ରିପୋର୍ଟରେ ଦର୍ଶାଯାଇଛି ।
ସର୍ଭେ ରିପୋର୍ଟକୁ ବିଶ୍ଲେଷଣ କଲେ ସ୍ପଷ୍ଟ ହେଉଛି ଯେ ପ୍ରଧାନମନ୍ତ୍ରୀ ମୋଦିଙ୍କ ଲୋକପ୍ରିୟତା ହ୍ରାସ ପାଉଥିବା ବେଳେ କଂଗ୍ରେସ ଅଧ୍ୟକ୍ଷ ରାହୁଳ ଗାନ୍ଧିଙ୍କ ସମର୍ଥନ କ୍ରମାଗତ ଭାବେ ବୃଦ୍ଧି ପାଉଛି । ପରବର୍ତ୍ତୀ ପ୍ରଧାନମନ୍ତ୍ରୀ ପଦ ପାଇଁ ଦେଶବାସୀଙ୍କ ପସନ୍ଦ ଅପସନ୍ଦକୁ ନେଇ କରାଯାଇଥିବା ପ୍ରଶ୍ନର ଉତ୍ତରରେ ରାହୁଳଙ୍କଠାରୁ ୨୩% ଆଗରେ ମୋଦି ଅଛନ୍ତି ବୋଲି ଜଣାପଡ଼ିଛି । ବିରୋଧୀ ଦଳରୁ ମୋଦିଙ୍କ ଶ୍ରେଷ୍ଠ ବିକଳ୍ପ ରୂପେ ରାହୁଳ ୪୬% ସର୍ମଥନ ପାଇଥିଲେ ହେଁ ଏବେ ମଧ୍ୟ ମୋଦି ଯଥେଷ୍ଟ ଆଗରେ ଅଛନ୍ତି । ତେବେ ଏହି ଲୋକପ୍ରିୟତାର ଧାରା କ୍ରମେ ହ୍ରାସପାଇବା ବିଜେପି ପାଇଁ ନିଶ୍ଚୟ ଚିନ୍ତାର ବିଷୟ । ରାହୁଳଙ୍କ ପିଲାଳିଆମି ଓ ଅପରିପକ୍ୱତା ପାଇଁ ଦେଶବାସୀଙ୍କ ନିକଟରେ ସେ ପପୁ ରୂପେ ପରିଚିତ ଥିଲେ । ତେବେ ସମୟ ବଦଳିବା ସହ କଂଗ୍ରେସ ଅଧ୍ୟକ୍ଷ ହେବା ପରେ ତାଙ୍କ ନେତୃତ୍ୱର ଗ୍ରହଣୀୟତା କ୍ରମେ ବୃଦ୍ଧି ପାଉଛି । ୨୦୧୬ ଅଗଷ୍ଟରେ ତାଙ୍କ ନେତୃତ୍ୱ ପ୍ରତି ସମର୍ଥନ ହାର ମାତ୍ର ୨୩ ପ୍ରତିଶତ ଥିବା ବେଳେ ତାହା ୨୦୧୮ ଜୁଲାଇ ସୁଦ୍ଧା ୪୬ ପ୍ରତିଶତକୁ ବୃଦ୍ଧି ପାଇବା ଅନ୍ୟ ଏକ ସକରାତ୍ମକ ଦିଗ । ରାହୁଳଙ୍କ ପ୍ରତି ଜନ ସମର୍ଥନ ୨୦୧୭ ଜାନୁୟାରୀରେ ୨୮%କୁ ଓ ବର୍ଷକ ପରେ ତାହା ୪୫%କୁ ବୃଦ୍ଧି ପାଇଛି । ଗତ ଜାନୁୟାରୀରୁ ଜୁଲାଇ ମାସ ମଧ୍ୟରେ ଏହି ହାର ବୃଦ୍ଧି ପାଇ ୪୬%ରେ ପହଞ୍ଚିଛି । ଏହି ଅଢ଼େଇ ବର୍ଷ ମଧ୍ୟରେ ବିଭିନ୍ନ ଜାତୀୟ ପ୍ରସଙ୍ଗକୁ ଠିକଣା ଭାବେ ଉପସ୍ଥାପନା କରିବାର ସାମର୍ଥ୍ୟ ପ୍ରଦର୍ଶନ ଦୃଷ୍ଟିରୁ ତାଙ୍କର ଲୋକପ୍ରିୟତା କ୍ରମାଗତ ଭାବେ ବୃଦ୍ଧି ପାଉଛି । ଏହି ଧାରା ଅବ୍ୟାହତ ରହିଲେ ୨୦୧୯ ଏପ୍ରିଲ ବେଳକୁ ଜାତୀୟ ରାଜନୈତିକ ଦୃଶ୍ୟପଟ୍ଟରେ କିଛି ବଡ଼ ଧରଣର ପରିବର୍ତ୍ତନ ଘଟିବା କିଛି ବିଚିତ୍ର ନୁହେଁ । ଏଠାରେ ଆମେ କେବଳ ତାଙ୍କର ରାଜନୈତିକ ପରିପକ୍ୱତା ବିଚାରକୁ ନେଲେ ଠିକ୍ ହେବ ନାହିଁ । ଦେଶରେ ପରିଲକ୍ଷିତ ବେକାରୀ, ମୂଲ୍ୟବୃଦ୍ଧି ଓ ଦୁର୍ନୀତି ବିରୋଧରେ ସୃଷ୍ଟି ହୋଇଥିବା ଜନମତ ମୋଦିଙ୍କ ନେତୃତ୍ୱ ଆଡ଼ୁ ମୁହଁ ଫେରାଉଥିବାରୁ ବିକଳ୍ପ ନେତୃତ୍ୱ ରୂପେ କ୍ରମେ ରାହୁଳଙ୍କ ଉପରେ ଆସ୍ଥା ସ୍ଥାପନ କରୁଛନ୍ତି ।
ଆସନ୍ତା ଏପ୍ରିଲର ରାଜନୈତିକ ସ୍ଥିତିରେ ଯେଉଁ ପରିବର୍ତ୍ତନ ଆଶାକରୁଛୁ ସେଥିରେ ରାହୁଳଙ୍କ ନେତୃତ୍ୱରେ ବିରୋଧୀ ମେଣ୍ଟ ଯେ ସରକାର ଗଢିବାକୁ ସମର୍ଥ ହେବ ଏକଥା ନୁହେଁ । କିନ୍ତୁ ବିଜେପିର ସ୍ଥିତି ଅପେକ୍ଷାକୃତ ଅଧିକ କ୍ଷୁଣ୍ଣ ହେବ, ଯେଉଁଥି ପାଇଁ କି ଦଳକୁ ଏକ ବୃହତ୍ତର ମେଣ୍ଟ ଉପରେ ନିର୍ଭର କରିବାକୁ ପଡ଼ିବ । ଫଳରେ ବିଜେପିର ଗୋପନ ଏଜେଣ୍ଡା ସହଯୋଗୀଙ୍କ ସମର୍ଥନ ଅଭାବରୁ କାର୍ଯ୍ୟକାରୀ ହେବା ସମ୍ଭବ ନୁହେଁ । ଆମେ ଏଠାରେ ଉଲ୍ଲେଖ କରିବାକୁ ଚାହୁଁ ଯେ ୨୦୧୮ ଜାନୁୟାରୀରୁ ଜୁଲାଇ ମାସ ମଧ୍ୟରେ ମୋଦିଙ୍କ ନେତୃତ୍ୱ ପ୍ରତି ଥିବା ସମର୍ଥନ ହାର ୬% ହ୍ରାସ ପାଇବା ବିଜେପି ପାଇଁ ଏକ ସତର୍କ ଘଣ୍ଟି । ଏହି ହାର ଅବ୍ୟାହତ ରହିଲେ ୨୦୧୯ ଏପ୍ରିଲ ବେଳକୁ ସ୍ଥିତି କଣ ହେବ ତାହା ଏବେ ଠାରୁ ଆକଳନ କରିବା ଠିକ୍ ହେବନି । ତେବେ ସରକାର ଗଠନ କରିବା ପାଇଁ ବିଜେପିକୁ ଏକ ବୃହତ୍ତର ମେଣ୍ଟ ଉପରେ ନିର୍ଭର କରିବାର ସମ୍ଭାବନା ଥିବାରୁ ସହଯୋଗୀଙ୍କ ସର୍ତ୍ତ ନିକଟରେ ଦଳ ସେତେବେଳେ ମୁଣ୍ଡ ନୁଆଁଇବାକୁ ବାଧ୍ୟ ହେବ । ବିରୋଧୀଙ୍କୁ ଜାତୀୟ ରାଜନୈତିକ ଦୃଶ୍ୟପଟ୍ଟରେ ମୁଣ୍ଡ ଟେକିବାକୁ ନଦେବା ପାଇଁ ମୋଦିଙ୍କ ପକ୍ଷରୁ ଯେଭଳି ଅକ୍ରୋଶମୂଳକ କଳକୌଶଳ ପ୍ରୟୋଗ କରାଯାଇଛି ସେଥିରେ ସେମାନେ ବିଜେପିକୁ ସରକାର ଗଠନରେ ସହଯୋଗ ବିନିମୟରେ ନେତୃତ୍ୱ ପରିବର୍ତ୍ତନ ସର୍ତ୍ତ ରଖିବା ସମ୍ଭାବନାକୁ ଏଡ଼ାଇ ଦିଆଯାଇ ନପାରେ । ଏମିତି ଦେଖିବାକୁ ଗଲେ ମୋଦିଙ୍କ ନେତୃତ୍ୱ ପ୍ରତି ବିରୋଧୀଦଳ ଅପେକ୍ଷା ନିଜ ଦଳରୁ ବିପଦ ଅଧିକ । ଆଗାମୀ ନିର୍ବାଚନ ପାଇଁ ଯେଉଁ ସମ୍ଭାବନାର ଅଙ୍କକଷା ଚାଲିଛି ସେଥିରେ ବିଜେପିରେ ମଧ୍ୟ ମୋଦିଙ୍କ ବିକଳ୍ପ ନେତୃତ୍ୱ ନେଇ ଗୋପନ ଉଦ୍ୟମ ଆରମ୍ଭ ହୋଇଥିବାର ସୂଚନା ମିଳୁଛି । ତେବେ ଏସବୁ ନିର୍ଭର କରେ ନିର୍ବାଚନରେ ବିଜେପିର ଆସନ ସଂଖ୍ୟା ଉପରେ ।

ବରିଷ୍ଠ ସାମ୍ବାଦିକ, କାନନ ଦାଶ

Previous ଟେଷ୍ଟରେ ପୁଣି ଶୀର୍ଷକୁ ଫେରିଲେ କୋହଲି
Next ସ୍ଥାପତ୍ୟ ସହ ପ୍ରକୃତିର ସହର ବାରିପଦା

No Comment

Leave a reply

Your email address will not be published. Required fields are marked *