ଦୃଷ୍ଟିଶକ୍ତିକୁ ପ୍ରଭାବିତ କରେ ମୋବାଇଲ

Protect eyes from mobile

ବିନା ପରିଶ୍ରମରେ ଥକି ପଡ଼ିବା ଏବଂ ଆଖିରେ ଯନ୍ତ୍ରଣା ଅନୁଭୁତ ହେଉଛି କି? ଏଇ କିଛି ଦିନ ମଧ୍ୟରେ ଆପଣଙ୍କ ଆଖିତଳ କଳା ଦିଶୁଛି କି? କ୍ରମାଗତ ଭାବେ ଆପଣଙ୍କ ମୁଣ୍ଡ କିଛି ସମୟ ପାଇଁ ବିନ୍ଧୁଛି କି? ଏ ସବୁ ସମସ୍ୟାର କାରଣ ମୋବାଇଲ ନୁହେଁ ତ?

ଆମର ବ୍ୟସ୍ତବହୁଳ ନିତିଦିନିଆ କାମକୁ ସହଜ ଓ ସରଳ କରିଥିବା ମୋବାଇଲର କିଛି କୁପ୍ରଭାବ ରହିଛି । ମୋବାଇଲ ଡିସ୍ପ୍ଲେରେ ହାଇ ଏନର୍ଜି ଭିଜିବଲ୍ ଲାଇଟ୍ ରହିଥାଏ, ଯାହାକୁ ଆମେ ବ୍ଲୁ ଲାଇଟ୍ ବୋଲି କହିଥାଉ । ଏହି ହାଇ ଏନର୍ଜି ଭିଜିବଲ୍ ଲାଇଟ୍ କୁ ଆମ ଆଖି ଠୁଁ ଅଳ୍ପ ଦୂରରୁ ଦେଖିଲେ କିମ୍ବା ଅଧିକ ସମୟ ଚାହିଁ ରହିଲେ ଆଖିର ଟିସ୍ୟୁଗୁଡ଼ିକୁ କ୍ଷତି ପହଞ୍ଚାଇଥାଏ । ମୋବାଇଲ ଆଖି ରୋଗର ମୁଖ୍ୟ କାରଣ । ସୂର୍ଯ୍ୟ କିରଣ ଏବଂ ଏଲ୍ଇଡି ବଲ୍ବରେ ମଧ୍ୟ ଏହି ବ୍ଲୁ ଲାଇଟ୍ ରହିଛି । ଏହାର ସଂସ୍ପର୍ଶରେ ଆମେ ନିୟମିତ ରହିନଥିବାରୁ କୌଣସି ଅସୁବିଧା ହୁଏନାହିଁ । କିନ୍ତୁ ନିରବଚ୍ଛିନ୍ନ ମୋବାଇଲ୍ ବ୍ୟବହାର ଅନେକ ସମୟରେ ଦୃଷ୍ଟିଶକ୍ତି ହାନୀର କାରଣ ହୋଇଥାଏ । ଏଥିପାଇଁ ଆମର କିଛି ଅଭ୍ୟାସକୁ ବଦଳାଇବା ଜରୁରୀ ।

ବାରମ୍ବାର ଆଖି ପଲକ ପକାଇବା
ଆପେ ଆପେ ଆଖି ପଲକ ପକାଇବା ଆମ ଶରୀରର ଏକ ପ୍ରାକୃତିକ ଆଚରଣ । ଏହା ଆମ ଜାଣ ଅଜାଣତାରେ ହୋଇଥାଏ । ଏହାଦ୍ୱାରା ଆମ ଆଖିକୁ ଆରାମ ମଧ୍ୟ ମିଳିଥାଏ । ଯେବେ ଆମେ ମୋବାଇଲରେ କୌଣସି ଭିଡିଓ ଦେଖୁ କିମ୍ବା ଅନ୍ୟ କୌଣସି କାର୍ଯ୍ୟ କରୁ ସେତେବେଳେ ଆଖି ପଲକ ପକାଇବା ଭୁଲିଯାଉ କିମ୍ବା ଏ କ୍ଷେତ୍ରରେ ବ୍ୟତିକ୍ରମ ଘଟିଥାଏ । ମୋବାଇଲ ବ୍ୟବହାର କଲାବେଳେ ଆଖି ପୋଡ଼ିବା ବା ବିନ୍ଧିବା ପ୍ରାୟତଃ ସମସ୍ତେ ଅନୁଭବ କରିଥିବେ । ଗୋଟିଏ କଥା ଜାଣି ରଖିବା ଉଚିତ ଆଖି ପଲକ ପକାଇବା କମ୍ ହେଲେ ଆଖି କୁଣ୍ଡେଇ ହବା, ଜଳାପୋଡ଼ା ଆଦି ଅନୁଭୁତ ହୋଇଥାଏ । ବାରମ୍ବାର ଆଖି ପଲକ ପକାଇ ମୋବାଇଲ ଦେଖିଲେ ସେଥିରୁ ବାହାରୁ ଥିବା ହାଇ ଏନର୍ଜି ଭିଜିବଲ୍ ଲାଇଟର ପ୍ରଭାବରୁ ଆଖିକୁ ସୁରକ୍ଷା ମିଳେ ।

ମୋବାଇଲ ବ୍ୟବହାର ପାଇଁ ସମୟ ନିର୍ଦ୍ଧାରଣ
ବହୁତ ସମୟ ଧରି ମୋବାଇଲ ଦେଖୁଥିଲେ ଏହା ଆଖିପାଇଁ କ୍ଷତିକାରକ । ଯଦି ଅଫିସ କିମ୍ବା ଅନ୍ୟ କୌଣସି କାମ ମୋବାଇଲରେ କରୁଛନ୍ତି ତେବେ କ୍ରମାଗତ ଭାବେ ସ୍କ୍ରିନକୁ ନଦେଖି କିଛି ସମୟ ବ୍ୟବଧାନ ରଖି ଦେଖନ୍ତୁୁ । ଚେଷ୍ଟା କରନ୍ତୁ ଅତି ବେଶୀରେ ଏକାଥରକେ ୨୦ ମିନିଟରୁ ଅଧିକ ସମୟ ମୋବାଇଲ ନଦେଖିବା ପାଇଁ । ୨୦ ମିନିଟ ପରେ ଆଖିକୁ କିଛି ସମୟ ବନ୍ଦ ରଖି ପୁଣି କାମ ଆରମ୍ଭ କରିବା ଉଚିତ । ନହେଲେ ଆଖିରେ ସଫା ପାଣି ଛାଟି କିଛି ସମୟ ଧୋଇ ଦେବା ଭଲ । ଯାହା ଆଖିକୁ ସୁରକ୍ଷା ଦିଏ ।

ମୋବଇଲରୁ ଉଚିତ ଦୂରତା ରକ୍ଷା କରିବା

ଛୋଟ ବେଳେ ଆମେ ଅନେକେ ଟିଭି ପାଖରେ ବସି ଦେଖୁଥିବାରୁ ଗାଳି ବା ମାଡ଼ ଖାଇଥିବା ନିଶ୍ଚୟ । କାହିଁକି ଜାଣନ୍ତି? କାରଣ ଅତି ନିକଟରୁ ଟିଭି ସ୍କ୍ରିନକୁ ଦେଖିଲେ ଆମ ଆଖି ଉପରେ ଏହାର ଖରାପ ପ୍ରଭାବ ପଡ଼ିଥାଏ । ଠିକ୍ ସେହିଭଳି ମୋବାଇଲ ସ୍କ୍ରିନକୁ ସଠିକ୍ ଦୂରତ୍ୱରୁ ଦେଖିବା ନିହାତି ଜରୁରୀ । ଉଚିତ ସ୍ତର ଏବଂ ସଠିକ୍ ଦୂରତା ରଖି ମୋବାଇଲ ବ୍ୟବହାର କଲେ କିଛି ମାତ୍ରାରେ ଆଖିକୁ ଆରାମ ମିଳିଥାଏ । କେବଳ ମୋବାଇଲ ନୁହେଁ ବହି ପଢ଼ିବା ବେଳେ ମଧ୍ୟ ଏଥିପ୍ରତି ଧ୍ୟାନ ଦେବା ଆବଶ୍ୟକ । ଗୋଟିଏ କଥା ମନେରଖିବା ଉଚିତ ଆମ ଆଖି ଠାରୁ ମୋବାଇଲର ଦୂରତା ୧୬ ରୁ ୧୮ ଇଞ୍ଚ ରହିଲେ ଭଲ ।

ମୋବାଇଲର ବ୍ରାଇଟନେସ୍ କମାଇବା
ଆଖିକୁ ସୁରକ୍ଷା ଦେବା ପାଇଁ ମୋବଇଲର ବ୍ରାଇଟନେସ୍ କମ୍ ରଖିବା ଉଚିତ୍ । ବ୍ରାଇଟନେସ୍ ଅଧିକ ଥିଲେ କିମ୍ବା କମ୍ ରହିଲେ ଆମ ଆଖି ଉପରେ ତାହାର ପ୍ରତିକୂଳ ପ୍ରଭାବ ଅଧିକ ପଡେ । ତେଣୁ ଆବଶ୍ୟକ ମୁତାବକ ବ୍ରାଇଟନେସ୍ ରଖିବା ଜରୁରୀ ଯେମିତିକି ଆଖି ଉପରେ ଅଧିକ ଚାପ ପଡ଼ିବନି । ଅନ୍ଧାର କୋଠରୀ କିମ୍ବା ରାତିରେ ମୋବାଇଲ ବ୍ୟବହାର କଲାବେଳେ ବ୍ରାଇଟନେସ କମାଇବା ଉଚିତ । ଆଜିକାଲି ନୂଆ ସ୍ମାର୍ଟଫୋନ୍ ବଜାରରେ ମିଳିଲାଣି ଯେଉଁଥିରେ ସ୍କ୍ରିନରେ ଗ୍ଲେୟାର ପ୍ରୋଟେକ୍ଟର ବ୍ୟବହାର କରାଯାଉଛି । ଯଦି ଏଭଳି ଫୋନ୍ ବ୍ୟବହାର କରୁଛନ୍ତି ତେବେ ଆଖି ପାଇଁ ବହୁତ ଭଲ ।

ଆଖିର ସୁରକ୍ଷା ଦୃଷ୍ଟିରୁ ମୋବାଇଲ ଫୋନର ବ୍ୟବହାର କିଭଳି କରିବା ଉଚିତ ତାହା ଜାଣିନେଲେ ଆମକୁ ଆଉ ଆସୁବିଧା ନାହିଁ । ଏଥିପାଇଁ କିଛି ଟିପ୍ସ ବି ଜାଣିଲେ । ଆଉ ଗୋଟିଏ କଥା ମନେ ରଖିବା ଉଚିତ, ମୋବାଇଲରେ ଥିବା ଟେକ୍ସଟ୍ ଗୁଡ଼ିକର ଆକାର ଆମର ଆଖିକୁ ସୁହାଇଲା ଭଳି ରଖିବା ଉଚିତ । ମୋବାଇଲର ସେଟିଙ୍ଗସ୍ କୁ ଯାଇ ଠିକ ଭାବେ ପଢ଼ିହେଲା ଭଳି ଟେକ୍ସଟ୍ ସାଇଜ୍ ରଖିବାକୁ ହୁଏ । ଯେତେ କମ୍ ସମୟ ମୋବାଇଲ ସଂସ୍ପର୍ଶରେ ରହିବେ ସେତେ ଭଲ । ଧିରେ ଧିରେ ଏହା ଅଭ୍ୟାସରେ ପରିଣତ ହୋଇଗଲେ ଆଉ ଅସୁବିଧା ହେବନାହିଁ । ଏହା ଆପଣଙ୍କ ଆଖିକୁ ସୁରକ୍ଷିତ ରଖିବ ।

ଦିପ୍ତିରଞ୍ଜନ ବେହେରା

Previous ଗିନିଜ୍ ବୁକରେ ସୁଦର୍ଶନ
Next ବିଶ୍ୱଜିତଙ୍କ ନିଆରା ପ୍ରେମ, ପ୍ରୀତି ଉପହାର

No Comment

Leave a reply

Your email address will not be published. Required fields are marked *