ପାଦ ଦୁର୍ଗନ୍ଧରୁ ମୁକ୍ତି ପାଇବାକୁ 10ଟି ସହଜ ଉପାୟ

ଆପଣ ଜୋତା ଖୋଲି ବନ୍ଧୁମାନଙ୍କ ପାଖକୁ ଗଲେ ସେମାନେ ନାକ ଟେକୁଛନ୍ତି କି? ଆପଣଙ୍କଠୁ ଦୂରେଇ ଦୂରେଇ ରହୁଛନ୍ତି କି? ଏଭଳି ସମସ୍ୟା ଯଦି ଆପଣ ସବୁଦିନ ଭୋଗୁଛନ୍ତି, ତେବେ ଏହାର କାରଣ ଆପଣ ପାଦରୁ ବାହାରୁଥିବା ଦୁର୍ଗନ୍ଧ ହୋଇପାରେ । ହୁଏତ ଆପଣ ସବୁବେଳେ ଜାଣିପାରୁନଥିବେ, କିନ୍ତୁ ଆପଣଙ୍କ ପାଦ ଦୁର୍ଗନ୍ଧ ସମସ୍ୟା ଅନେକଙ୍କ ମନରେ ଆପଣଙ୍କ ପ୍ରତି ଘୃଣାଭାବ ଆଣୁଥାଇପାରେ । ହାଇପରହାଇଡ୍ରୋସିସ୍ ବା ପାପୁଲି ଓ ପାଦରୁ ଅତ୍ୟଧିକ ଝାଳ ବୋହିବା କିମ୍ବା ପାଦରେ ସଂକ୍ରମଣ ହେଲେ ସେଠାରେ ବ୍ୟାକ୍ଟେରିଆ ବା ବୀଜାଣୁ ସଂଖ୍ୟା ବୃଦ୍ଧି ପାଏ ଓ ପାଦରୁ ଦୁର୍ଗନ୍ଧ ବାହାରିଥାଏ । ତେବେ ଆପଣ ଯଦି ପାଦ ଦୁର୍ଗନ୍ଧ ସମସ୍ୟାରୁ ମୁକ୍ତି ପାଇବାକୁ ଚାହୁଁଛନ୍ତି, ତେବେ ସେଥିପାଇଁ କେତୋଟି ସରଳ ଉପାୟ ରହିଛି ।

1. ପାଦ ଓ ନଖ ସଫା ରଖନ୍ତୁ: ପାଦ ଦୁର୍ଗନ୍ଧ ସୃଷ୍ଟି କରୁଥିବା ବ୍ୟାକ୍ଟେରିଆ ନଖ ତଳେ ଜମିଥିବା ମଇଳା ଓ ଗୋଇଠି ଭଳି ଟାଣ ହୋଇଯାଇଥିବା ସ୍ଥାନରେ ବଂଶବୃଦ୍ଧି କରିଥାଏ । ତେଣୁ ନିୟମିତ ପାଦ ଧୋଇବା ବେଳେ ଭଲଭାବେ ଗୋଇଠି ଆଦିରେ ଥିବା ମୃତ କୋଷିକା ଗୁଡ଼ିକୁ ଘଷି ସଫା କରନ୍ତୁ । ଏଥିପାଇଁ ପମିସ୍ ପଥରର ବ୍ୟବହାର କରିପାରନ୍ତି । କେବଳ ପାଦ ନୁହେଁ, ପାଦର ନଖ ତଳକୁ ମଧ୍ୟ ପରିଷ୍କାର କରନ୍ତୁ । ପାଦ ନଖକୁ ଛୋଟ ରଖିବାକୁ ଚେଷ୍ଟା କରନ୍ତୁ । ଫଳରେ ସେଠାରେ ଅଧିକ ମଇଳା ଜମିବ ନାହିଁ ।
2. ପାଦ ଧୋଇସାରି ଭଲଭାବେ ପୋଛନ୍ତୁ: ପାଦ ଧୋଇସାରି ଆପଣ ଭଲଭାବେ ପାଦକୁ ପୋଛୁନାହାନ୍ତି କି? ପାଦ ଅଧିକ ସମୟ ଓଦା ରହିଲେ ଆଙ୍ଗୁଠି ସନ୍ଧି ଭଳି କେତେକ ସ୍ଥାନରେ ବ୍ୟାକ୍ଟେରିଆ ବଂଶବୃଦ୍ଧି ଘଟି ସଂକ୍ରମଣ ହୋଇପାରେ । ତେଣୁ ପାଦକୁ ଭଲଭାବେ ପୋଛନ୍ତୁ । କେବଳ ପାଦ ନୁହେଁ, ପାଦ ପୋଛିବା ବେଳେ ପାଦ ଆଙ୍ଗୁଠିଗୁଡ଼ିକ ମଝିରେ ମଧ୍ୟ ଭଲଭାବେ ପୋଛିବାକୁ ଭୁଲନ୍ତୁ ନାହିଁ ।
3. ଭାରି ଉପକାରୀ ଚାହାପତି: ପାଦରୁ ବ୍ୟାକ୍ଟେରିଆ ସଫା କରିବା ପାଇଁ ଓ ପାଦରୁ ଝାଳ ବୋହିବା କମ୍ କରିବା ପାଇଁ ଚାହାପତି ବା ଚାହାଗୁଣ୍ଡର ବ୍ୟବହାର କରନ୍ତୁ । 1 ଲିଟର ଗରମ ପାଣିରେ 3 ଚାମଚ ଚାହାଗୁଣ୍ଡ ପକାଇ କିଛି ମିନିଟ୍ ପରେ ସେଥିରେ 2 ଲିଟର ଥଣ୍ଡା ପାଣି ମିଶାନ୍ତୁ । ଏହାପରେ ସେଥିରେ 15ରୁ 30 ମିନିଟ ଯାଏଁ ପାଦ ବୁଡ଼ାଇ ରଖନ୍ତୁ ।
4. ଭିନେଗାରର ବ୍ୟବହାର: ଆପଲ୍ ସାଇଡର୍ ଭିନେଗାର (Apple Cider Vinegar) ପାଦ ଦୁର୍ଗନ୍ଧ ଦୂର କରିଥାଏ । 500 ମି.ଲି. ଆପଲ୍ ସାଇଡର୍ ଭିନେଗାରକୁ 200 ମି.ଲି. ଉଷୁମ ପାଣିରେ ମିଶାନ୍ତୁ । ଗୋଟିଏ ଗଜକନାକୁ ସେଥିରେ ଓଦା କରି ପାଦରେ 20 ମିନିଟ ଯାଏଁ ଭଲଭାବେ ପାଦରେ ଘଷନ୍ତୁ । ଏହାପରେ ପାଦକୁ ନପୋଛି ଆପେଆପେ ଶୁଖିବାକୁ ଛାଡ଼ି ଦିଅନ୍ତୁ ।
5. ସୁଗନ୍ଧି ତୈଳର ବ୍ୟବହାର: ପାଦର ଦୁର୍ଗନ୍ଧ ଦୂର କରିବା ପାଇଁ ଲାଭେଣ୍ଡର୍ ତେଲ ଖୁବ୍ ଉପଯୋଗୀ । ଏହା ଦ୍ୱାରା ବ୍ୟାକ୍ଟେରିଆ ସଂକ୍ରମଣରୁ ମଧ୍ୟ ମୁକ୍ତି ମିଳିଥାଏ । ତେଣୁ 4ଟୋପା ଲାଭେଣ୍ଡର୍ ତେଲ ନେଇ ପାଦରେ ମାଲିସ କରନ୍ତୁ । କିମ୍ବା 3ରୁ4 ଲିଟର ପାଣିରେ 2 ଟୋପା ଲାଭେଣ୍ଡର୍ ତେଲ ପକାଇ ସେହି ମିଶ୍ରଣରେ 10ରୁ 15 ମିନିଟ ଯାଏଁ ପାଦ ବୁଡ଼ାଇ ରଖନ୍ତୁ ।
6. ମୋଜାକୁ ଭଲଭାବେ ସଫା କରନ୍ତୁ: ମୋଜା ସଫା କରିବା ବେଳେ ଏହାକୁ ଓଲଟାଇ ଭିତରପଟକୁ ମଧ୍ୟ ଭଲଭାବେ ସଫା କରନ୍ତୁ । ଫଳରେ ମୋଜା ଭିତରେ ଥିବା ପାଦର ମୃତ କୋଷିକା ଓ ବ୍ୟାକ୍ଟେରିଆ ସଫା ହୋଇଯାଏ । ଆପଣଙ୍କ ପାଦ ଦୁର୍ଗନ୍ଧ ହେଉଥିଲେ ସିନ୍ଥେଟିକ ମୋଜା ବ୍ୟବହାର କରନ୍ତୁ ନାହିଁ ।
7. କେବଳ ମୋଜା ଲଗାଇ ଚାଲନ୍ତୁ ନାହିଁ: ସେ ବାହାରେ ହେଉ କି ଘରେ, ପାଦରେ କେବଳ ମୋଜା ଲଗାଇ ଚାଲିଲେ ତାହା ଅପରିଷ୍କାର ହୋଇଯାଏ ଏବଂ ସେଥିରେ ବ୍ୟାକ୍ଟେରିଆ ବଂଶବୃଦ୍ଧି କରିଥାଏ । ମୋଜା ଓଦା ଥିଲେ ସେଥିରେ ବ୍ୟାକ୍ଟେରିଆ ବୃଦ୍ଧି ପାଇବାର ଆଶଙ୍କା ଆହୁରି ବଢ଼ିଯାଏ ଏବଂ ମୋଜାରୁ ଓ ପାଦରୁ ଦୁର୍ଗନ୍ଧ ବାହାରେ ।
8. ଜୋତାକୁ ସଫା ରଖନ୍ତୁ: ଜୋତାକୁ ସଫା କଲାବେଳେ ଏହାର ଉଭୟ ବାହାର ଓ ଭିତରପଟ ଭଲଭାବେ ସଫା କରନ୍ତୁ । ଏହାର ଇନସୋଲ୍ ଏବଂ ସୁ-ଲେସ୍ କୁ କ୍ଲୋରେକ୍ସିଡାଇନ୍ କିମ୍ବା ଅନ୍ୟ ଆଣ୍ଟିସେପ୍ଟିକ୍ ପାଣିରେ ବୁଡ଼ାଇ ରଖନ୍ତୁ । ଏହି ଆଣ୍ଟିସେପ୍ଟିକ୍ ପାଣିରେ ତୁଳାକୁ ଭିଜାଇ ଜୋତା ଭିତର ପଟକୁ ପୋଛନ୍ତୁ ।
9. ଜୋତା ଶୁଖିଲା ରଖନ୍ତୁ: ବର୍ଷା ଦିନ ପାଇଁ ଦୁଇହଳ ଜୋତା ରଖିବା ଭଲ । ଫଳରେ ଗୋଟିଏ ଜୋତା ଓଦା ହେଲେ ତାହା ଶୁଖିବା ଯାଏଁ ଅନ୍ୟଟି ପିନ୍ଧିପାରିବେ । ଯଦି ଆପଣଙ୍କ ହଳେ ଜୋତା ଅଛି ଏବଂ ତାହା ଓଦା ହୋଇଗଲା, ତେବେ ତାହାକୁ ଶୁଖାଇବା ପାଇଁ ଜୋତା ଭିତରେ କିଛି ଖବରକାଗଜକୁ ମୋଡ଼ି ପୁରାଇ ଦିଅନ୍ତୁ ଓ ଗୋଟିଏ ରାତି ସେମିତି ଛାଡ଼ି ଦିଅନ୍ତୁ । ଖବରକାଗଜ ଜୋତା ଭିତରୁ ସମସ୍ତ ଆର୍ଦ୍ରତା ଶୋଷି ନେବ । ଏଥିପାଇଁ ଇଲେକ୍ଟ୍ରିକ୍ ଡ୍ରାୟର୍ ମଧ୍ୟ ବ୍ୟବହାର କରାଯାଇପାରେ ।
10. ଡାକ୍ତରଙ୍କ ପରାମର୍ଶ ନିଅନ୍ତୁ: ଯଦି ପାଦରୁ ଅତ୍ୟଧିକ ଏବଂ ଅସ୍ବାଭାବିକ ଭାବେ ଦୁର୍ଗନ୍ଧ ବାହାରୁଛି, ପାଦ କୁଣ୍ଡେଇ ହେଉଛି କିମ୍ବା ସେଥିରୁ ଚର୍ମ ଛାଡ଼ିବା ଭଳି ଲକ୍ଷଣ ଦେଖାଯାଉଛି, ତେବେ ତୁରନ୍ତ ଡାକ୍ତରଙ୍କ ପରାମର୍ଶ ନିଅନ୍ତୁ । ଏହା କୌଣସି ଗୁରୁତର ସଂକ୍ରମଣ କିମ୍ବା ଗୋଲ କୃମିର ଲକ୍ଷଣ ହୋଇପାରେ ।