ଧାନ ଚାଷ ପାଇଁ ଜମି ପ୍ରସ୍ତୁତି


ଜମିର କିସମ ଅନୁଯାୟୀ ଧାନଚାଷ ପାଇଁ ଜମି ପ୍ରସ୍ତୁତି କରିବା ନିତ୍ୟାନ୍ତ ଆବଶ୍ୟକ । ଖରାଟିଆ ଚାଷ ଅତ୍ୟନ୍ତ ଉପାଦେୟ । ଲଙ୍ଗଳ କିମ୍ବା ଟ୍ରାକ୍ଟର ସାହାଯ୍ୟରେ ୨-୩ ଓଡ଼ ଖରାଟିଆ ଚାଷ କରିବା ଭଲ । ଏଭଳି କରିବା ଦ୍ୱାରା ମାଟି ଓଲଟ ପାଲଟ ହୋଇଥାଏ । ତଳମାଟି ଉପରକୁ ଓ ଉପର ମାଟି ତଳକୁ ହୋଇଯାଏ । ଜମିରେ ଥିବା ଅନିଷ୍ଟକାରୀ ପୋକମାନଙ୍କର ଅଣ୍ଡା, ଶୂକ ଓ ଖୋସାଗୁଡ଼ିକ ମାଟିତଳୁ ପଦାକୁ ବାହାରି ଆସି ସୂର୍ଯ୍ୟକିରଣରେ ମରିଯାନ୍ତି । ମାଟି ହାଲୁକା ହେବା ଫଳରେ ବାୟୁ ଚଳାଚଳ ସୁବିଧାରେ ହୋଇଥାଏ । ମାଟିର ଜଳ ସଂରକ୍ଷଣ ଶକ୍ତି ବଢ଼ିଥାଏ । ଅନାବନା ଘାସ ସୂର୍ଯ୍ୟ ଉତ୍ତାପରେ ଶୁଖି ବର୍ଷା ଜଳରେ ପଚିସଢ଼ି ସେହି ମାଟିରେ ମିଶେ । ଏହାଫଳରେ ମାଟିର ଜୈବିକ ଅଂଶ ବଢେ଼ ଓ ମାଟି ସୁସ୍ଥ ରୁହେ ।

ଢିପ ଜମିରେ ଭଲ ବର୍ଷା ହେବା ପରେ ପରେ ଦୁଇ ତିନି ଓଡ଼ ଗଭୀର ଚାଷ କରି ମଇ ଦେଇ ମାଟି ଗୁଣ୍ଡ କରିବାକୁ ପଡ଼ିଥାଏ । ଗଡ଼ାଣିଆ ଜମିର ବିପରିତ ଦିଗରେ ଚାଷ କରିବା ଉଚିତ । ଜମିର ଗଡ଼ାଣିକୁ ନଜରରେ ରଖି ଛୋଟଛୋଟ ହିଡ଼ ଦେଇ ମାଟି ସମତୁଲ କରିଦେଲେ ଭଲ । ଜମିରେ ଶେଷ ଓଡ଼ ଚାଷ ବେଳକୁ ହେକ୍ଟର ପ୍ରତି ଅତି କମ୍‌ରେ ୫ ଟନ୍ ସଢ଼ା ଗୋବର ଖତ ପ୍ରୟୋଗ କରିବା ଆବଶ୍ୟକ ।

ମଝିଆଳି ଓ ଖାଲ ଜମିରେ ଧାନ ବୁଣାଯାଏ କିମ୍ବା ରୁଆଯାଏ । ବୁଣା ଓ ରୁଆ ଜମିରେ ସବୁଜ ସାର ହିସାବରେ ଧଣିଚା ବୁଣିବାକୁ ପଡ଼ିଥାଏ । ଗଛଗୁଡ଼ିକ ବଡ଼ ହୋଇଗଲେ ବେଉଷଣ ପୂର୍ବରୁ ଟ୍ରାକ୍ଟର ମାଧ୍ୟମରେ ଗଛକୁ ମାଟିରେ ମିଶାଇ ଦେବାକୁ ହୁଏ । ବେଉଷଣ କିମ୍ବା ରୁଆବେଳେ ଜମିର ଉର୍ବରତା ବୃଦ୍ଧି ହେବାସହ ଆବଶ୍ୟକୀୟ ଯବକ୍ଷାରଜାନର ପ୍ରାୟ ୨୦-୨୫ ଭାଗ ପର୍ଯ୍ୟନ୍ତ ଫସଲକୁ ଯୋଗାଏ । ଫଳରେ ସାର ଖର୍ଚ୍ଚ କମ୍ ହୋଇଥାଏ । ଏକର ପ୍ରତି ୧୦କି.ଗ୍ରା ଧଣିଚା ମଞ୍ଜି ସବୁଜ ସାର ହିସାବରେ ବୁଣିବା ଉଚିତ ।

Previous ଧାନ ବିହନ କିସମଚୟନ
Next ଧାନ ଚାଷ ପାଇଁ ମାଟି ପରୀକ୍ଷା

No Comment

Leave a reply

Your email address will not be published. Required fields are marked *